Tempo de castañas, tempo de magosto!

Coa chegada do outono, os días fanse máis curtos, as follas tinguen as rúas de cores e hai un arrecendo inconfundible que nos anuncia que chegou unha das festas máis saborosas do ano: o magosto!

Como xa vén sendo tradición no IES de Becerreá, o pasado mércores, 4 de novembro, reunímonos para celebrar esta festa tan nosa, unha ocasión perfecta para gozar das nosas tradicións, compartir bos momentos e, por suposto, saborear unhas deliciosas castañas asadas.

O alumnado puido degustar este froito tan típico do outono e participar en diferentes xogos tradicionais, recuperando así parte desas formas de diversión de sempre que pasan de xeración en xeración. Porque, se algo ten o magosto, é que non precisa de grandes cousas para facernos gozar: unhas boas castañas, xogos, risas e ganas de compartir!

Pero este ano tamén quixemos ir un pouco máis alá da degustación. No hall do centro instalouse unha pequena exposición para descubrir máis sobre as orixes do magosto e a historia das castañas, así como sobre a ciencia que hai detrás deste delicioso manxar. Porque si, mesmo algo tan tradicional como as castañas asadas ten a súa explicación científica! Esta parte da actividade foi posible grazas á colaboración das nosas profesoras de Ciencias, ás que lles agradecemos unha vez máis a súa implicación.

Entre castañas, xogos e aprendizaxe, celebramos unha vez máis unha tradición que forma parte da nosa cultura e que nos lembra a importancia de conservar e compartir o noso patrimonio.

Porque no outono hai moitas cousas que celebrar, pero poucas tan deliciosas como un bo magosto!

 

O Samaín enche de misterio o IES de Becerreá!

 

Cando chega o Samaín, algo estraño comeza a acontecer no IES de Becerreá… Os corredores énchense de segredos, aparecen criaturas arrepiantes e ata os zombis parecen espertar do seu sono! Este ano, no noso centro non faltaron as ganas de celebrar unha das épocas máis máxicas e terroríficas do calendario.

No hall do instituto instalouse unha exposición dedicada a diferentes lendas populares dos Ancares, como «A corza branca», «O Demo nos Ancares» ou a lenda da «Ponte de Gatín». O alumnado tivo a oportunidade de achegarse a estas historias e descubrir parte do noso imaxinario popular durante a hora de ler, unha actividade da que xa vos falamos con máis detalle nunha publicación anterior.

Pero o misterio non quedou aí! Tamén puidemos contemplar os fantásticos traballos realizados polo alumnado de Plástica: pequenas escenas de terror que recreaban cemiterios, casas embruxadas e outros recunchos dignos da noite máis arrepiante do ano. E todo iso elaborado con caixas de zapatos e moita, moitísima creatividade!

Os corredores do instituto tampouco escaparon á transformación. Co noso concurso de decoración de portas de Samaín, os diferentes grupos puxéronse mans á obra para converter as súas aulas en auténticos escenarios de medo. Arañeiras, criaturas misteriosas e decoración terrorífica tomaron os corredores nunha proposta na que, ademais de botar a imaxinación a voar, se apostou pola reutilización de materiais de refugallo. O grupo gañador levou como premio unhas entradas de cine. Parabéns a todos e todas polo traballo!

E, como o medo tamén pode escribirse, en colaboración coa Biblioteca organizamos un concurso de microrrelatos de terror. A creatividade e a imaxinación do noso alumnado deron lugar a historias capaces de poñer os pelos de punta. Moi pronto poderedes descubrir neste mesmo blog o relato gañador… Se vos atrevedes a lelo!

Por se todo isto fose pouco, o noso Club de Ciencias tamén quixo achegar o seu particular toque terrorífico cun experimento moi especial: conseguiremos espertar un zombi? A resposta e todos os detalles desta experiencia están no blog do Club de Ciencias, así que non deixedes de visitalo!

Entre lendas, historias de medo, portas terroríficas, relatos arrepiantes e experimentos sorprendentes, despedimos un Samaín cheo de actividade, imaxinación e participación.

A noite máis terrorífica do ano xa quedou atrás… pero non vos relaxedes demasiado. Que será o seguinte que andamos argallando?

 Samaín nos Ancares: lendas para ver, ler e compartir

Hai historias que pasan de xeración en xeración e que gardan a memoria e o misterio da nosa terra. Neste Samaín, no IES de Becerreá queremos darlles voz e convidarvos a descubrir algunhas das lendas da comarca dos Ancares.

O Equipo de Dinamización da Lingua Galega (EDL), en colaboración coa biblioteca escolar, propón unha Hora de Ler especial na que se unen a lectura, a tradición oral e a creatividade. Todas as lendas desta actividade foron recompiladas polo alumnado do EDL, que tamén se encargou de realizar o vídeo.

Este venres, ás 10:00 horas, todas as clases de ESO e de 1º e 2º de FP Básica poderán gozar desta proposta nas súas aulas. A través do blog do EDL, proxectarase o vídeo no que cobran vida dúas historias da nosa comarca: A corza branca e O demo nos Ancares.

A sesión completarase coa lectura nas aulas doutras dúas lendas recompiladas polo alumnado do EDL: A lenda da Ponte de Gatín e O Coxo das Veigas. Catro relatos para achegarnos a lugares, personaxes e misterios que forman parte do noso patrimonio cultural.

Celebrar o Samaín é tamén escoitar as historias que nos contaron, compartilas e facer que sigan vivas. Con esta actividade queremos poñer en valor a riqueza da tradición oral dos Ancares e gozar do galego como lingua para contar, imaxinar e crear.

Grazas ao alumnado do EDL polo seu traballo de recompilación das lendas e de realización do vídeo, e á biblioteca escolar por compartir esta celebración arredor da lectura e das historias da nosa terra.

Este venres, na Hora de Ler, o misterio dos Ancares entra nas aulas. Bo Samaín e boas lecturas!

OTERO PEDRAYO 2026

 ANO OTERO PEDRAYO 2026

Con motivo da conmemoración do Ano Oteriano, no noso centro quixemos dar visibilidade ao recoñecido autor das nosas letras facendo unha exposición nos paneis da entrada principal. Neles, describimos a súa traxectoria de vida, a súa formación e o seu traballo a favor da cultura galega: como integrante do Grupo Nós, a súa labor na Editorial Galaxia... e, en conxunto, a súa postura galeguista que defendía a valía de Galicia e dos seus trazos distintivos. 

Para achegar ó alumnado ás súas obras, amosáronse nos puntos de lectura e tamén se leron en alto algúns dos seus libros, por exemplo, o coñecido Arredor de si e Contos de santos e Nadal. 

DÍA DO LIBRO 2026

 RECOMENDACIÓNS LECTORAS E CITA A CEGAS CUN LIBRO 

Para conmemorar o Día do Libro 2026, no IES de Becerreá fixemos unha exposición de recomendacións de lecturas no que participou todo o alumnado. Escribindo nunhas tarxetiñas os libros que querían recomendar, foise creando un panel cheo de novos libros por descubrir. Esta actividade está á vista de todos na entrada principal do centro, de maneira que todo aquel que pase por alí poderá achegarse para coller ideas de novas lecturas. 

Por outro lado, aproveitando un magnífico traballo desenvolto dentro do proxecto "Monte Vivo", que dirixe o profesor Miguel, colgáronse dunha das árbores máis recomendacións: libros de Otero Pedrayo con motivo do Ano Oteriano 2026, os lidos nos clubes de lectura do centro, e outros textos que poden ser de interese. 

Ademais, cunha iniciativa que parte do Equipo da Biblioteca, o alumnado pode levar prestado un libro pero... ollo! A graza da actividade está en que non se saberá que libro é ata que se abra. Desta maneira, os rapaces e rapazas poden descubrir novas lecturas dun xeito distinto e (quen sabe!) quizais namorar do libro que lles tocou! 

EQUIPO DE REDACCIÓN DA REBOLA 2026

XA SE PUXO EN MARCHA DA REDACCIÓN DA NOSA REVISTA DE CENTRO: A REBOLA 

O equipo de redacción da Rebola do curso 2025-2026 xa está formado e está traballando nos contidos da próxima revista. Os voluntarios, Abel, Lucas e Juan Diego (1º da ESO), Ana, Elena e Andrey (3º da ESO), Belén, Alejandra, Laura e Cristina (1º de BAC) e Tatiana (2º de BAC) idearon as seccións que tería a revista neste curso e organizáronse en equipos para sacar adiante o traballo. Ademais, Miguel, profesor de Debuxo, deseñará co alumnado de 3º da ESO a nova portada. 

Coma sempre, sairá do prelo a finais de xuño. Estamos desexando vela! 

NUNO, DE GRANDE AMORE, VISITA O CENTRO

CO GALEGO CHÉGASE MOI LONXE

No marco das actividades promovidas polo Equipo de Dinamización da Lingua Galega do IES de Becerreá, o noso centro tivo recentemente a sorte de recibir a visita de Nuno Pico, líder do grupo galego Grande Amore, quen compartiu unha xornada moi especial co alumnado de Bacharelato e cos integrantes do EDL.

Durante o encontro, Nuno falou con moita proximidade sobre a súa experiencia persoal e profesional, explicando como conseguiu compaxinar os estudos coa súa paixón pola música. O artista tamén afondou no seu proceso creativo, contando como nacen as letras das súas cancións e como foi evolucionando ao longo dos anos ata converterse nunha das voces máis recoñecibles da escena musical actual.

A charla resultou especialmente enriquecedora para o alumnado, que puido coñecer de primeira man as dificultades, aprendizaxes e ilusións que acompañan o camiño artístico. Ademais, Nuno transmitiu unha mensaxe moi valiosa: que a creación en galego pode traspasar fronteiras e chegar moi lonxe. A traxectoria de Grande Amore, con concertos e xiras por distintos puntos de España e mesmo recentemente por México, é unha mostra clara da forza e da proxección da nosa lingua tamén no ámbito musical.

O alumnado participou activamente facendo preguntas, compartindo impresións e atopando nas palabras e na experiencia de Nuno unha referencia próxima e inspiradora. Sen dúbida, foi unha experiencia moi significativa que permitiu achegar ao alumnado á realidade da creación artística contemporánea en galego desde unha perspectiva auténtica e cercana.

Desde o IES de Becerreá queremos agradecer sinceramente a Nuno Pico a súa visita, a súa xenerosidade e a cercanía coa que compartiu a súa experiencia co noso alumnado. Foi un verdadeiro pracer contar coa súa presenza no centro e agardamos poder seguir desenvolvendo iniciativas que acheguen ao alumnado referentes culturais comprometidos coa lingua e coa creación galega.