Exposición de acrósticos compostos polo alumnado de 3º da ESO no vestíbulo do IES de Becerreá 

    Un acróstico (do grego ákros: «extremo», e stikhos: «liña», «verso» ou «estrutura») é unha composición poética ou prosaica cuxas letras iniciais, medias ou finais de cada verso ou oración, son lidas en sentido vertical e forman un vocabulario ou unha locución. Por extensión, chámase tamén acróstico á palabra ou frase formada coa composición acróstica.

    O alumnado de 3º da ESO de Lingua Galega, dentro do marco de actividades desenvoltas na materia realizou  as composicións inspirándose en diferentes temáticas, o traballo foi compartido co resto do centro cunha pequena exoisicón no vestíbulo.  Tamén as podedes disfrutar na conta de calameo do EDL, aquí abaixo tedes o enlace.

PREME AQUÍ SE QUERES VER AS COMPOSICIÓNS DO ALUMNADO

CELEBRACIÓN DA  8ª EDICIÓN DO PREMIO IES DE BECERREÁ Á PROMOCIÓN DA LINGUA E A CULTURA GALEGAS NA COMARCA DOS ANCARES

O grupo musical feminino Son de Cores gañadoras do 8º edición do premio.

    Hoxe, no salón de actos do centro tivo lugar a entrega do premio singular no ámbito educativo galego, orixinal e único. É este un premio para aqueles que no sector cultural e non cultural favorecen e impulsan a o noso idioma e a nosa cultura nesta comarca.

O PREMIO  “IES de BECERREÁ Á PROMOCIÓN DA LINGUA E A CULTURA GALEGAS NA COMARCA DOS ANCARES” nace no 2014 como proxecto do Equipo de Dinamización Lingüística  destinado a recoñecer iniciativas, traballos recentes, traxectorias de persoas individualmente, colectivos ou entidades comprometidas coa promoción e dignificación social do noso patrimonio lingüístico e cultural e pertencentes á comarca de influencia do Instituto. O Premio  quere contribuír a ese obxectivo de recoñecer aos que no seu labor teñen en conta o noso e tamén implicar o conxunto da comunidade educativa na súa consecución, este ano o Premio foi concedido a un grupo de persoas cunhas fortes raíces na nosa comarca, raíces persoais, profesionais, culturais,  un colectivo cultural de MULLERES dos Ancares que deron moito pola comarca e decidiron seguilo dando dende a música propia, recuperándoa e manténdoa, elas son o grupo Son de Cores.

Son de Cores son un colectivo de mulleres que botan a andar no 2012 co obxectivo de colaborar na recuperación dun instrumento emblemático dos Ancares: “a pandeira”, son mulleres, mulleres concienciadas sobre a importancia de todas aquelas que século tras século foron o elemento fundamental de transmisión e supervivencia da literatura popular, da música popular dos Ancares, elas compoñen o círculo que (como din elas) afonda na “historia da nosa comunidade, entendendo como operan as desigualdades, por que saber como afectaron ás que nos precederon é unha lección de vida, de supervivencia e de superación”. Despois de toda unha vida sendo activistas seguen bulindo, cantando as súas propias historias, reivindicando con naturalidade a súa condición, reclamando ese espazo que lles corresponde por compromiso e historia. Estes sinais de identidade son os que decidiron que elas foran as premiadas por que representan o espírito do noso premio: comprometidas co idioma, comprometidas coa historia en feminino, coa nosa cultura e coas raíces ben chantadas  na nosa comarca.

Moitas grazas por agasallarnos coa vosa música que tamén é nosa.

PREME ABAIXO PARA VER O VÍDEO DO ACTO.

 

MARÍA REIMÓNDEZ NO IES DE BECERREÁ

    Este venres 24 de maio, a escritora María Reimóndez compartiu co alumnado de 2º e 3º da ESO do noso instituto unha hora de confidencias arredor da súa obra, do seu constante activismo e, como non, das súas orixes en Becerreá e como o noso concello aparece reflectido na súa obra.
 

    O coloquio entre maría e o alumnado tratou, en primeira instancia, da novela Corredora lida polo alumnado de 3º. A preguntas destes, María foi desvelando a inspiración, as experiencias e os porqués desa historia. Como ela viviu un tempo en Etiopía, como quería visualizar as mulleres que trunfan no deporte e tamén a dura vida en países que teñen serias dificultades para sobrevivir e non contan coa suficiente axuda do mundo chamado “rico”, ao contrario, seguen sendo tratados como colonias das que aproveitarse sen dar nada a cambio.
 
    Preguntada sobre o seu amplo activismo, ela devolveu a pregunta ao alumnado: “por que non sodes vós activistas con todo o que está ocorrendo ao voso redor e no mundo”.
 
    Tamén explicou que as súas raíces en Becerreá son profundas, que volve con frecuencia e que en varios dos seus libros aparece reflectida esta historia súa.
 
    María Reimóndez Meilán, nada en Lugo en 1975, é unha escritora galega, doutora en tradución e interpretación pola Universidade de Vigo. Cultiva tanto a narrativa e a poesía coma o ensaio e o teatro.
Leva traballando en cooperación desde o ano 1994, cando realizou a súa primeira visita a un proxecto de desenvolvemento na India. Despois de novas visitas, todos na India, fundou a Organización Non Gobernamental de Cooperación ao Desenvolvemento Implicadas no Desenvolvemento que leva traballando na India desde o ano 1998 e desde 2003 en Etiopía en proxectos de desenvolvemento integral.
Como narradora, no ano 2003 recibiu o premio de novela Mulleres Progresistas de Vigo con O Caderno de Bitácora. No ano 2005 quedou finalista do Premio Xerais con O club da calceta, que foi galardoada co Premio San Clemente e que foi traducida ao italiano por Attilio Casteluci e o castelán por María José Vázquez Paz, adaptada ao teatro por Teatro do Morcego e ao cine por Ficción Producciones. A partir de aí publicou as novelas Pirata e En vías de extinción. Esta última dá inicio ao Ciclo dos elementos , unha serie de novelas independentes pero interconectadas, á que tamén pertencen A música dos seres vivos e o Premio Xerais 2014 Dende o conflito, ademais de As cousas que non queremos oír . En 2020 recibe o Premio Pinto e Maragota pola diversidade sexual e de xénero do Concello de Pontevedra por Cobiza.
    Tamén ten publicados numerosos títulos de literatura infantil e xuvenil. No ano 2005 quedou finalista do Premio Merlín de Literatura Infantil con Usha , personaxe ao que retornou con Volvo! O regreso de Usha. Ademais, publicou  seis libros infantís sobre as comarcas galegas en Editorial Everest, Lía e as zapatillas de deporte -Premio Frei Martín Sarmiento 2010- e O Monstro das palabras . Para o público infantil publica tamén O xeito das froitas. Premio Frei Martín Sarmiento 2019 e A formiga destemida. En 2017 publica Corredora , dirixida ao público xuvenil e gaña o I Premio Agustín Fernández Paz pola Igualdade por Fóra do normal.

 

 

 

 Dúas alumnas do IES de Becerreá gañan o III Certame Escolar de IlustrarNÖS da Deputación de Lugo

As gañadoras Noa Digón Uría de 3º da ESO  e Noa López Villares de 1º de Bac asistiron ao acto que a Vicepresidencia da Deputación convocou e que tivo lugar no Pazo de San Marcos, 22 de maio.

    Co obxectivo de promover entre o alumnado a creatividade artística e plástica e achegarlle o gusto pola arte de ilustrar, o Departamento de Plástica do IES de Becerreá sumouse a esta iniciativa presentando varios traballos realizados polo alumnado, o resultado foi moi satisfactorio acadando dous traballos premiados neste III Certame.

Cada 30 de xaneiro, desde 2014 a área de cultura da Deputación de Lugo celebra o Día da Ilustración como xeito de impulsar esta arte, popularizar a obra de diferentes profesionais e animar á creación artística como punto de partida para novos valores da ilustración galega. Esta efeméride coincide co aniversario do nacemento de Castelao. O que outrora fora membro do Seminario de Estudos Galegos e do grupo Nós, creativo e divulgador a través de múltiples formas de expresión, deixou a súa pegada plasmada en numerosas ilustracións, caricaturas e escritos que o converten na cabeceira dunha grande lista de artistas que a nosa ilustración foi dando ao longo do tempo e que este 2024 lembra a figura do humorista gráfico, xornalista e publicista, Chichi Campos.

Parabéns ao alumnado pola participación e polo traballo desenvolto. Aquí podesdes ver os traballos premiados.

O autor viveirense Primitivo Marcos imparte unha charla para o alumnado da ESO do centro

No marco de actividades programadas no centro para a participación  no proxecto da Deputación de Lugo Ilustrar-nós o autor viveirense Primitivo Marcos achegou o proceso creativo da banda ilustrada ao IES de Becerreá co ciclo “A aventura de ilustrar”.

A proposta inclúe unha exposición baseada no último traballo do debuxante viveirense, a adaptación a banda deseñada da novela “O paso do Noroeste”, de Xavier Queipo. A través de cadros orixinais e paneis explicativos, a mostra explica, cun carácter pedagóxico e divulgativo,  cada unha das etapa creativa do proceso de ilustración, dende a creación en bosquexos sinxelos da idea inicial ao remate a cor dun debuxo xa finalizado.

A exposición compleméntase cunha conferencia na que Primitivo Marcos explica ao alumnado o proceso de ilustrar un texto, os pasos que este implica e as súas dificultades, incidindo nas posibilidades que ofrece a imaxe para narrar contextos históricos. Na charla, tamén aborda a  figura de Castelao como referente da ilustración en Galiza e  a súa obra, na que destaca a capacidade de crear imaxes sinxelas pero cargadas de simbolismo.

Con esta iniciativa ofrécese ao alumnado a posibilidade de achegarse á tarefa de ilustrar un texto, que, mais aló da banda deseñada, se aplica noutros ámbitos como o da creación publicitaria,  o da animación ou o deseño de moda.

Así, ademais de fomentar a creatividade e achegar ao alumnado á lectura de banda deseñada, a proposta ofrece recursos para  valoración e o fomento da mirada crítica das ilustracións que adoitan acompañar os textos.

 

 

 Rebeca Losada visita o IES de Becerreá

    A actividade na que participaron o alumnado de 3º, 4º ESO e dúas alumnas de 2º de BAC parte do programa IlustrarNÓS da área de Cultural da Deputación de Lugo, unha actividade coa que achegar a ilustración aos centros escolares de primaria e secundaria da provincia a través do fomento da  creatividade. A idea é achegar ás xeracións máis novas o traballo de creadoras e creadores galegos neste eido.

    O estudantado formouse coa charla a cargo da ilustradora Rebeca Losada, que visitou o centro o 9 de abril.

    Rebeca naceu en  Lugo en 1982 é ilustradora e deseñadora. Actualmente reside en Madrid.

    Bióloga de profesión, con 26 anos cambia o mundo científico polo das artes apostando pola súa gran paixón: debuxar. Centra a súa actividade no mundo textil e editorial pero o seu amor pola música a leva a realizar numerosas portadas de discos e cartaces para diferentes artistas (Xoel López, Love os Lesbian, Rozalén, Vetusta Morla, Wilco...) ou locais de referencia como O Náutico de O Grove.

    Da música da o salto ilustrando múltiples eventos como festas populares ou festivais (festas de Maria Pita 2022 en A Coruña ou festas de Nadal 2022 de Santiago de Compostela), campañas publicitarias (Ecologistas en Acción), colaboracións con ongs internacionais (Save a Girl ou IMBALA) ou campañas en colaboración co consulado de España en Jerusalem ou Israel. Isto acabará por convertela nun referente no deseño gráfico de pósters e a realizar numerosos talleres e exposicións polo ámbito nacional. Unha das últimas este pasado verán na Casa Museo de María Pita de A Coruña.

    Recentemente é seleccionada por Meta como gañadora da campaña #apoiamosasboasideas.

 Celebración do "Día de Rosalía de Castro no IES de Becerreá"

Exposición dos traballos realizados polo alumnado de 3º ESO de EPV e 4º ESO de expresión artística.

Somos dos poucos pobos do mundo que temos unha muller referente, porque temos a Rosalía de Castro. O 23 de febreiro conmemórase o Día de Rosalía, coincidindo coa data na que naceu no ano 1837; con flores e poemas dela celebramos o seu día, que é o que merecemos os galegos e galegas que falamos no idioma no que compuxo os poemas máis bonitos do mundo. Por iso, o Equipo de Dinamización da Lingua e o departamento de Lingua Galega do IES de Becerreá, agasallaron a todo o centro cun caravel e un libro editado e deseñado polo Departamento de Plástica, con orixinais portadas creadas polo alumnado.

O acto de celebración consistiu nun recitado con fondos de piano que interpretou o alumnado de música de 4º da ESO, no que se puxo de manifesto o afortunados  que somos de ter a Rosalía de Castro.

    PREME PARA VER O VÍDEO DO ACTO