SAMAÍN 2025: PERSONAXES DE TERROR FEMININOS NA CULTURA GALEGA E NA CULTURA CLÁSICA

 SAMAÍN 2025: PERSONAXES MISTERIOSOS FEMININOS NA CULTURA GALEGA E NA CULTURA CLÁSICA 

CELEBRACIÓNS DE SAMAÍN NO IES DE BECERREÁ

A semana do Samaín no centro estivo repleta de actividades! Aquí vos deixamos unha mostra dunha delas: a exposición de personaxes de terror e misterio da cultura galega e da cultura romana e grega, feita en colaboración o EDL e o departamento de Latín, coa axuda do resto do profesorado e alumnado. 

Todo o mundo sabe xa que o Samaín é unha tradición ben antiga en Galicia, de orixe celta. Coincide coa noite de defuntos, aínda que en realidade era, antigamente, a data do final das colleitas e o comezo do inverno. A crenza era que o vivos e os mortos se xuntaban e facían certos rituais para pedir protección ante as almas malvadas. As cabazas (que tamén traballaron no noso centro os alumnos coa axuda do profesor de Debuxo, Miguel) usábanse baleiras con luces dentro, e as familias xuntábanse arredor dunha fogueira. 

Na época romana, salvando as diferenzas, existía a festividade do Mundus Patet, que conmemoraba o paso aberto do mundo dos vivos ó dos mortos a través dun gran buraco no centro da cidade de Roma. As familias tamén se xuntaban para celebrar e pedir protección e saúde. 

Así, o Samaín galego e as festas romanas comparten unha mesma esencia: o respecto pola natureza, polos ciclos do tempo e pola memoria dos que xa non están. Porén, cada un deles teñen os seus propios personaxes e divindades. Aquí podedes premer para saber máis sobre isto!

DÍA DAS ESCRITORAS 2025

 DÍA DAS ESCRITORAS NO IES DE BECERREÁ

 A X Edición celébrase este ano 2025  o 13 de outubro baixo o lema "1975: Escribide, compañeiras!". No IES de Becerreá quixemos achegar algunhas das escritoras galegas contemporáneas ao alumnado cunha exposición nas escaleiras que conducen á biblioteca, onde tamén se realizou unha exposición. É unha oportunidade para recoñecer o traballo e o talento das mulleres que escriben en galego. e de reflexionar sobre a importancia da igualdade tamén na creación cultural.

Podedes ver esta exposición no seguinte vídeo: 

PROXECTO: TAMÉN EN GALEGO EN BECERREÁ

 TAMÉN EN GALEGO EN BECERREÁ

UN PROXECTO INNOVADOR E MULTIDISCIPLINAR QUE PRETENDE AUMENTAR A PRESENZA DO GALEGO EN BECERREÁ E A CONTORNA

O proxecto “Tamén en galego” ten como finalidade fomentar o uso do galego e darlle visibilidade tanto a nivel formal como escrito en todos os ámbitos públicos e privados, empresariais e comerciais.

O primeiro obxectivo céntrase en fomentar o uso do galego e promover o seu uso destacado en establecementos e lugares. Para conseguilo, propóñense identificar aqueles espazos que xa empregan o galego, facilitar a incorporación da lingua galega en materiais escritos destes ámbitos, e manter un diálogo continuo para garantir unha implantación sostible. Para medir o éxito, analizarase o número de locais que aceptan modificar ou incrementar o uso do galego, a cantidade de documentación traducida e a percepción social recollida mediante enquisas. Entre as actividades previstas atópase a elaboración dun mapa lingüístico de Becerreá no que o alumnado rexistrará o uso do galego nos establecementos, unha campaña con carteis e adhesivos para locais que se sumen á iniciativa, e charlas con empresarios para explicar os beneficios do uso do galego.

O segundo obxectivo céntrase en trasladar á práctica escrita o uso maioritario do galego na lingua oral. Para iso, realizarase a identificación e documentación dos locais onde o galego predomina oralmente pero non por escrito, concienciarase aos responsables da importancia da coherencia entre fala e escritura, e ofrecerase asesoramento lingüístico para facilitar esta transición. Como indicadores de logro, analizarase o aumento de materiais escritos en galego, a comparación do uso oral e escrito antes e despois do proxecto, e o número de consultas lingüísticas recibidas. Entre as actividades destacan un diagnóstico sociolingüístico a través de entrevistas, a elaboración polo alumnado de propostas para adaptar documentos e materiais ao galego, e a creación dun servizo de apoio lingüístico desde o EDL.

O terceiro obxectivo consiste en recoñecer os establecementos que destacan polo uso do galego na rotulación, información escrita, publicidade e redes sociais. Para iso, elaborarase unha listaxe destes locais, difundiranse mediante recoñecementos e promocións, e avaliarase o impacto para animar a máis locais a sumarse. Os indicadores inclúen o número de locais recoñecidos, o seguimento en redes sociais e testemuñas de comerciantes. As actividades serán a entrega de premios e distintivos, a difusión en medios e redes sociais, e a organización dun roteiro lingüístico para identificar e dar visibilidade aos locais comprometidos.

As áreas de actuación do proxecto divídense en dous ámbitos principais: o público e o privado. No ámbito público traballarase con institucións como o centro de saúde, concello, xulgado, correos, Garda Civil e centro social, enfocándose na documentación, formularios, informes e sinais informativos. No ámbito privado abarcaranse sectores diversos, como a hostalaría (cartas, menús, carteis, prezos), supermercados (seccións, propaganda, bolsas), tendas (textil, ferraxerías, librarías), talleres, gasolineiras, notarías, administracións de fincas, xestorías, autoescolas, actividades de culto e funerarias.

A temporización prevista comprende todo o curso 2024-2025 e cursos sucesivos. No curso pasado incidiuse principalmente nos ámbitos públicos mencionados, e no privado traballarase con 14 locais de hostalaría e dúas funerarias.

Aquí o vídeo que recolle a información compilada polo alumnado no curso anterior, coa que fixeron un diagnóstico da situación para o punto de partida sobre o que comezar a actuar: 

FIN DE CURSO 2024/25 NO IES DE BECERREÁ

 FESTIVAL DE CURTAS E REPRESENTACIÓN DE PEZAS SOCIOLINGÜÍSTICAS

O pasado 19 de xuño tivo lugar o festival de fin de curso no IES de Becerreá. Como cada ano, tiveron lugar varias actividades protagonizadas polos nosos rapaces e rapazas. En primeiro lugar, o alumnado de 4º da ESO representou unhas pezas de teatro de temática sociolingüística que amosan a situación de minorización da lingua galega en diversos contextos. A risa e o humor mesturábanse co fondo das obras,  que invitaban á reflexión sobre os prexuízos lingüísticos. 

De seguido, proxectáronse as curtas tamén realizadas polo alumnado de 4º, e a continuación o xurado deliberou para acabar entregando uns premios ó mellor actor ou actriz, mellor película e mellor guión. Todos quedamos abraiados coa calidade técnica e configuración das curtas, e co talento que temos no noso centro! Para o ano máis e mellor!

No seguinte enlace podedes ver o vídeo en Ioutube: https://youtu.be/SBa7JV7kxIU 

ENQUISA SOCIOLINGÜÍSTICA DO USO DO GALEGO

 O DEPARTAMENTO DE LINGUA GALEGA LEVA A CABO A ENQUISA ANUAL DO USO DAS LINGUAS, ESTA VEZ NO ÁMBITO FAMILIAR

Os datos amosan un panorama maioritariamente galegofalante no ámbito familiar, con diferentes graos de uso e conciencia lingüística: por unha banda hai unha percepción crítica que anima á súa maior presenza e prestixio; por outra banda, para unha parte dos enquisados, os prexuízos non desaparecen e a situación de diglosia mantense (o castelán segue a ser percibido como lingua A, a de prestixio). A perda da transmisión xeración estase a acelerar (30 puntos porcentuais de avoas/avós a netas/os).

Para ver os resultados da enquisa e as conclusións ás que chegamos, preme AQUÍ. 

(Extracto dunha das preguntas da enquisa)

ENTREVISTA INTERXERACIONAL ÓS AVÓS E AVOAS

Entrevista a Manuel Fernández, José Ramón Uría e Berta Vuelta

As Curuxas da Rebola entrevistan ós seus maiores, que nos relatan as experiencias da súa mocidade nas feiras e nas festas. A través desta actividade, preténdese difundir as vivencias dun tempo pasado, convidando así a reflexionar sobre os cambios que tiveron lugar e o estilo de vida de cada xeración. Quizais, ó que agora os netos e netas lle dan importancia antes nin se pensaba, e o que antes era verdadeiramente relevante hoxe concíbese de diferente maneira.  

Premendo aquí pódense ler as entrevistas completas.

DÍA DAS LETRAS GALEGAS 2025

HOMENAXEAMOS AS CANTAREIRAS E RECOÑECEMEOS O LABOR DOS MAIORES QUE PRESERVARON A TRADICIÓN Ó LONGO DO TEMPO

O pasado 17 de maio celebramos un pequeno acto de conmemoración polo Día das Letras Galegas, dedicado este ano ás cantareiras e á poesía popular. 

Quixemos tamén poñerlle nome e rostro a algunhas desas persoas anónimas que foron, durante séculos, a memoria viva do noso pobo.

O alumnado do IES de Becerreá que recolleu cantigas das súas casas (Álvaro Gómez de 1º ESO, Cristina e Lucía de 4º, Daniel García e Laura Nuñez de 1º BAC). Sabemos que esa tradición non é algo do pasado, senón algo que latexa, que se canta e se lembra nos camiños, nas cociñas, nos seráns dos  avós ou nos faladoiros ao pé da lareira. Carmen Digón, José Núñez, María Méndez, Iludina Martínez… e tantos outros nomes que nos emocionan porque son da nosa xente, xente brava, arroutada, que non calou cando había que cantar. Xente con sabedoría, con memoria, coa intelixencia de gardar e transmitir aquilo que hoxe é parte da nosa identidade. Eles e elas, sen saber quizais, alimentaron a Rosalía, a Curros, a Cunqueiro, a Fole... E tamén están nas músicas novas: nas voces das Fillas de Cassandra, da Banda da Loba, das Tanxugueiras.

Nese día quixemos dicirlles grazas, con todo o corazón. Grazas por manter viva a palabra cantada. A tradición oral non está nos libros. Está nas voces. 

Para ver e escoitar como os nosos maiores cantan cancións populares, preme no seguinte vídeo:

 

Ademais, completamos o acto coa actuación dun grupo de alumnado e da Asociación Son de Cores, que ademais de deleitarnos con mostras de música tradicional, concedéronnos unha pequena entrevista coa que puidemos coñecer mellor a estas mulleres comprometidas e amantes da tradición. 

Rematamos proxectando unha serie de vídeos que resaltan a lingua e a cultura galegas, no que os protagonistas son os membros da comunidade educativa do IES: o vídeo da nosa palabra favorita na nosa lingua materna, unha versión do "Dígocho eu!" (TVG) feita polo alumnado de Lingua Galega... 

Para ver un resumo do acto do Día das Letras Galegas, preme no seguinte vídeo:

Para ver o vídeo do "Dígocho eu!":

A CONTORNA DE BECERREÁ CO EMPRENDEMENTO SOSTIBLE

 TALLERES DE EMPRENDEMENTO SOSTIBLE

Os días 22 e 23 de abril o alumnado tivo a oportunidade de participar no Campus de emprendemento sostible promovido pola Deputación de Lugo. 

Durante a xornada do día 22, o alumnado de 3º da ESO e de 1º de BAC participaron nunha formación sobre a sostibilidade, a innovación, o emprendemento e a economía circular. Nestes días coñeceron o concepto de economía circular e puideron observar de primeira man varios exemplos desta maneira de proceder. Debateron sobre a importancia e a necesidade da sostibilidade para o noso entorno, e a importancia de atoparnos nunha reserva da biosfera. 

Remataron esta xornada fomentando a creatividade e a innovación mediante a procura de formas alternativas para facer os produtos que consumimos (un tetrabrick, unha estantaría modular, un paraugas ou un libro). 

O día 23, o alumnado de 1º de BAC tamén se desprazou a Casa Quiñones en Navia de Suarna para participar nun taller de elaboración de fieltro. Alí Pedro, o xerente, contounos como xurdiu a idea de crear un espazo de coliving e coworking no rural, e como o compaxina con outras actividades. De seguido, Balazs explicounos e ensinounos o proceso de obter o fío e o fieltro a partir da lá das ovellas, amosándonos como realizar o cardado e rematando coa elaboración de varios obxectos de fieltro por equipos baixo as súas indicacións. 

Dende o EDL apoiamos todas as iniciativas que poñan de relevo a concienciación ó alumnado e o fomento da perspectiva crítica ante os cuestións actuais. E, ademais, respaldamos e damos voz ás actividades desenvoltas na contorna do noso centro, de maneira que así, alumnas e alumnos, poden ver que as problemáticas do mundo actual están preto deles e que poden contribuír a poñerlles remedio na súa propia comarca. 

GRUPO DE TEATRO DO IES DE BECERREÁ

 'ATRACO NO BANCO', UNHA COMEDIA DISPARATADA 

O alumnado de 2º da ESO meteuse unha vez máis no papel duns atracadores para dar vida a unha divertida comedia dirixida profesorado do Departamento de Lingua Galega, e adaptada da obra orixinal do mesmo nome, do autor Manuel Núñez Singala. Un dúo de ladróns sen vocación, un director de banco máis delincuente que os propios atracadores, unha secretaria que parece inxenua pero que non o é tanto. Personaxes que fían unha disparatada trama na que a risa está máis que garantida. E tamén, como é norma do autor, unha obra que nos vai facer pensar, entre gargallada e gargallada, aínda que só sexa un pouquiño.

Esta vez, foi posta en escena no CEIP Plurilingüe San Xoán, de Becerreá, onde os alumnos e alumnas de primaria, familias e  profesorado acudiron a vela o pasado mes de abril. 

O grupo de teatro despois de rematar a función 

DÍA DO LIBRO 2025 NO IES DE BECERREA

 DÍA DO LIBRO 2025: CELEBRAMOS O ANO CASTELAO

Este ano, como o Día do Libro coincideu co aniversario do pasamento de Castelao, o alumnado elaborou un material gráfico para conmemorar a obra e a figura do autor. O alumnado de 3º e 4º da ESO, na materia de Plástica, deseñou unhas imaxes a toda cor de 'Castelao pop', tomando como referencia as súas ilustracións. Ademais, completaron a exposición cunhas figuras que encheron cos seus textos. 

Debuxante, caricaturista, ilustrador, escritor, historiador,... a súa obra amosa un profundo compromiso ético, social e político que se reflicte nos seus case dous centenares de obras. 

Ademais, o grupiño de rapaces e rapazas que colabora nas iniciativas do EDL e da Biblitoeca, as Curuxas da Rebola, idearon uns marcapáxinas para agasallar o 23 de abril a todo o centro. 

Finalmente, complementouse a exposición de Castalao coa mostra de todas as revistas do centro feitas ata o momento, dende os seus comezos ata o presente curso, para celebrar os 30 anos da publicación da Rebola. Dita exposición estará á vista na entrada ata final de curso. 

Fomentando o pensamento crítico na clase

A FORZA DO DEBATE: APRENDIZAXE E DIÁLOGO NA AULA

O pasado venres día 4, na materia de Cultura Científica de 1º de BAC, tivo lugar un intenso debate no que se argumentaba, por grupos, a favor ou en contra das vacinas. Certamente, é un tema de moita actualidade, co que todos estamos familiarizados tras vivir un periodo de confinamento debido ó COVID-19 máis ou menos recente. 

Os alumnos e alumnas de Cultura Científica seguiron a estrutura básica dun debate (introdución, refutacións e conclusión), por equipos, baseando as súas ideas en argumentos sólidos que se esforzaron en indagar, seleccionar e complementar con gráficas, imaxes e textos. Un traballo que tomaron moi en serio.

Os debates na clase son unha ferramenta fundamental para fomentar o pensamento crítico e a capacidade de argumentación. O alumnado, así, aprende a expresar as súas ideas apoiándose en datos obxectivos, e tamén a escoitar e a respectar as opinións dos demais. 

Neste caso, ademais, todo o alumnado empregou a nosa lingua para desenvolver a actividade, mesmo alumnado que non é galegofalante.  Esta iniciativa tamén contribúe á súa normalización e visibilidade, demostrando que o galego é unha lingua viva e útil para todos os ámbitos. 

Na liña do compromiso do noso centro para promover o uso do galego en todos os espazo atópanse este tipo de actividades: debater, reflexionar, dialogar e intercambiar ideas. 

Un exercicio fantástico o que os estudantes aprenderon, de seguro, moitísimo sobre o tema!

 

ENTROIDO 2025 NO IES DE BECERREÁ

O 28 DE FEBREIRO CELEBRAMOS O ENTROIDO CUN FESTIVAL POR TODO O ALTO

Como cada ano, no IES de Becerreá tivo lugar un concurso de comparsas, de doces e a queima do espantallo. Ademais, na entrada do centro puido observarse a exposición "Entroido polo mundo", que inclúe información e imaxes sobre este día en diferentes lugares do mundo e das súas diversas manifestacións en Galicia.

Exposición na entrada do centro

A xornada comezou co concurso de comparsas por cursos, no que tamén se presentaron grupos específicos (como As 'G' e 'O Polo Cucurella') e houbo mesmo houbo unha participación individual. Nalgunhas representacións acompañaron profesores e profesoras que se meteron no papel para tratar de conseguir os ansiados premios (unhas tortas de doces) que daba o xurado composto polo alumnado organizador do Entroido (4º da ESO) e Pilar, a profesora de Economía. Todo estivo estruturado por unhas presentadoras moi comprometidas en facer do festival algo memorable (que nos compartiron tamén uns chistes con temática de Entroido) e por música amenizada polas Djs de 4º. 

A continuación algunhas imaxes dos participantes: 

Gañadores de 2º de BAC

Gañadores de 2º da ESO

O día continuou coa degustación dos doces por parte dos xurado (4ºESO), mentras o resto do centro acudíamos a presenciar a queima do Espantallo (unha velutina!), este ano elaborado coa colaboración de Ismael, profesor de Tecnoloxía. 

Gañadores do concurso de doces

Finalmente, rematamos a xornada desfrutando da música e da compañía mutua. Para ver os vídeos e imaxes dese día preme AQUÍ. 

OBRADOIRO DE REGUEIFAS 2025

Visita da regueifeira Lupe Blanco

Este pasado luns, día 24 de marzo, tivemos a honra de disfrutar no IES de Becerreá coa bergantiñá Lupe Blanco, gañadora en varias ocasión de mellor regueifeira de Galiza. 

Explicounos que é unha regueifa e cal é a súa orixe, que resulta ben curiosa: é un desafío oral improvisado en verso cunha orixe que, debido ao seu carácter basicamente oral, se perde na noite dos tempos. A súa referencia máis próxima a nós di que durante o banquete das vodas labregas era tradición que a parella ou a madriña dos acabados de casar puxese a disposición dos que non foran convidados á celebración un bolo de pan chamado "regueifa". Ademais, a maneira de ver quen era a persoa á que lle cabía o honor de repartir a regueifa entre os presentes era retarse dialecticamente entre eles, en verse, meténdose uns con outros, cos contraentes ou cos familiares destes, para ver quen facía gala do maior enxeño e mordacidade.

Co paso do tempo, esta tradición chegou a ser un elemento  máis de diversión e de entretemento nas tabernas -xa que logo era unha práctica eminentemente masculina- ou mesmo como modo de espectáculo nas festas patronais.

Como datos curiosos contounos que o récord de regueifas seguidas está en trece horas e  que  esta práctica, coas súas variantes, está presente en moitas culturas do planeta: Cuba (décimas), Portugal (desgarrada), Brasil (desafío), EEUU (freestyle rap), Euskadi (bertsolarismo)... 

Interactuou co alumnado e profesorado e entre todos compuxemos varias regueifas seguindo o esquema métrico da copla popular: estrofas de catro versos octosílabos con rima asonante ou consonante nos pares.

DÍA DA POESÍA 2025 IES DE BECERREÁ

 O 21 DE MARZO CELEBRAMOS O DÍA DA POESÍA RECITANDO AS NOSAS PROPIAS COMPOSICIÓNS

Varios alumnos e alumnas do centro, que forman o grupo de creación literaria 'As Curuxas da Rebola', e que se reúne nos leceres na Biblioteca para dar renda solta á súa imaxinación, crearon uns poemas con motivo do Día Mundial da Poesía. Coa poesía expresamos a complexidade da vida, a beleza do mundo e os sentimentos máis profundos. A linguaxe da poesía é arte e emoción.

 

Estas composicións-que amosamos a continuación-foron elaboradas coa técnica do cadáver exquisito: un xogo de creación colectiva no que cada membro fai a súa aportación sen coñecer as dos outros membros, de maneira que o resultado é único e irrepetible. 

Ó longo da xornada do día 21 de marzo, estes alumnos e alumnas foron clase por clase recitando as composicións, e agasallaron ós compañeiros do centro cuns exemplares dos poemas.

Para ler os poemas preme aquí.

E para ver o vídeo en Ioutube, aquí.

LINGUA MATERNA 2025 IES DE BECERREÁ

 Facemos un vídeo onde recollemos as nosas palabras favoritas na nosa lingua materna

Tanto o alumnado como o profesorado do IES de Becerreá participou na elaboración dun vídeo onde cada quen comparte a súa palabra favorita na súa lingua materna (galego, castelán, inglés, rumano...), e explica que lle inspira ou transmite. 

No noso centro estamos comprometidos co uso do galego e coa posta en valor da nosa cultura, mais tamén somos conscientes de que a diversidade lingüística que posuímos é unha enorme riqueza e tamén hai que visibilizala. 

As linguas reflicten a pluralidade cultural e a historia dos pobos e recollen un mundo único de expresións, matices e formas de pensar. Non deixemos que ningunha morra!

Neste enlace tedes o vídeo.

8M NO IES DE BECERREÁ 2025

 'CON M DE MULLER': O IES DE BECERREÁ AMOSA O SEU COMPROMISO COAS MULLERES

Como cada ano, no noso centro quixemos conmemorar o Día Internacional da Muller, o 8 de marzo, con algunhas iniciativas destinadas a que o alumnado tome conciencia sobre a loita pola igualdade de xénero, neste día e en todos os do ano. Esta xornada é unha grande oportunidade para reflexionar sobre o camiño que queda por recorrer para rematar coas desigualdades existentes entre homes e mulleres. 

Por unha banda, varios alumnos e alumnas acudiron nos leceres á Biblioteca para deseñar unha pequena exposición de adxectivos escritos coa técnica de lettering, que describen ás mulleres: poderosa, loitadora, única, intelixente... 

Por outro lado, tamén se celebra, durante todo o mes, un concurso de microrrelatos no que pode participar todo o centro ('Con M de Muller'), que ten como tema central as mulleres, pero que pode versar sobre calquera asunto no que elas sexan as protagonistas. 

Por último, o alumnado de varias materias (Física e Química de 2º e 3º da ESO, Cultura Científica de 1º de BAC, e Latín e Grego de 1º de BAC, en colaboración co resto de profesorado do centro), elaborou unha táboa periódica das científicas. A maioría son galegas, do pasado e de agora, mais tamén atoparedes mulleres doutras nacionalidades. 

Para ver a táboa con enlaces ás infografías, preme AQUÍ!

DÍA DE ROSALÍA 2025 NO IES DE BECERREÁ

Este ano celebramos o Día de Rosalía con diferentes actividades no noso centro 

O 23 de febreiro celébrase o día do nacemento desta célebre autora galega. Coma sempre, creouse unha exposición sobre unha temática determinada para que todos puidesen vela nada máis entran no IES e, concretamente, este ano versou sobre as paisaxes na súa obra. A mostra contiña diferentes imaxes que reflectían, por unha banda, os sentimentos e emocións que expresa Rosalía nas diferentes obras e, por outra, amosaban alusións directas que fai a autora de diferentes lugares polos que pasou ou que lembra. Algunhas das imaxes estaban elaboradas seguindo o traballo "Herbario de Rosalía", da USC.

Exposición "Paisaxes na alma", na entrada.

Durante os leceres desa semana, os alumnos e alumnas voluntarios asistiron á Biblioteca para participar nun taller de lettering con poemas dela. Dende logo, temos todos uns artistas no IES de Becerreá! Ademais, tanto profesorado como alumnado contribuíron a confeccionar unhas pulseiras que se entregaron ó final dos actos dese día con motivos da obra da autora: follas, corazóns, estrelas... 

Igualmente, traballaron con Intelixencia Artificial para crear cancións a partir da súa poesía: con esta aplicación os estudantes elixían o ritmo e a música e, ó introducir a letra, daba lugar a un resultado moi bonito e curioso. Dende logo que lles gustou moito esta actividade!

No lecer dese día, na biblioteca, procedeuse á lectura dunha carta elaborada polo alumnado, dedicada a Rosalía, na que lle expresan como perciben a época actual e lle comentan algúns cambios significativos da actualidade que, sen dúbida, lle chamarían a atención. Porén, en realidade, no substancial as cousas non cambiaron tanto! Esta carta expúxose nuns paneis na biblioteca, acompañada de traballos do alumnado que fixeron nas materias de Plástica. Tamén se leron algúns dos seus poemas, os máis recoñecibles e outros menos, nos que destacaba a paisaxe.

Puxéronse, ademais, diferentes puntos de lectura no centro coa súa obra. 

Mostra do taller de lettering con poemas da autora

Para ver o vídeo coas imaxes e os actos dese día, PREME AQUÍ

Para escoitar as cancións realizadas con Intelixencia Artificial acompañadas da carta, AQUÍ

DÍA DA NENA E A MULLER NA CIENCIA 2025 NO IES DE BECERREÁ

 O 11 DE FEBREIRO CONMEMORAMOS O DÍA DA NENA E A MULLER NA CIENCIA CON DIFERENTES TRABALLOS

Con motivo deste día, no que se pretende poñer en valor a traxectoria de mulleres no ámbito científico, o alumnado do noso centro realizou unhas actividades en diferentes materias. É unha oportunidade de que vexan exemplos a seguir e de que se fomente o ambiente de igualdade no que se valora o talento e as contribucións sen importar o xénero.

Coa colaboración das materias Física e Química de 2º da ESO, de Bioloxía de 2º da ESO, de Cultura Científica de 1º de BAC, de Grego de 1º de BAC, e de Música de 4º da ESO, os alumnos e alumnas buscaron información sobre mulleres na tecnoloxía, matemáticas, química, astronomía e outras áreas STEM, da actualidade e da historia antiga. Así, foron capaces de recoñecer o esforzo e os méritos destas científicas investigando o seu percorrido, descubrimentos e aportacións que, sen dúbida, contribuíron ó progreso e á consecución da igualdade entre homes e mulleres. 

Con estes traballos os estudantes motiváronse puideron inspirarse para escoller no futuro carreiras científicas, nas que as mulleres son candidatas perfectamente capaces. 

Portada dun dos traballos realizados polo alumnado de Cultura Científica (1º de BAC).

Para ver os traballos, preme nas diferentes materias:

Física e Química e Bioloxía (2º da ESO).

Cultura Científica (1º de BAC).

Latín e Grego (1º de BAC).

AS CURUXAS DA REBOLA E ESCOLA DE PRENSA

As Curuxas da Rebola traballan en obradoiros literarios e na Escola de Prensa da revista escolar

Obradoiro de lettering no Día de Rosalía

As Curuxas da Rebola e a Escola de Prensa son dous proxectos nados no IES de Becerreá que teñen como finalidade promocionar o uso da lingua galega, sobre todo, na escrita. A través de diversos talleres de creación literaria, o alumnado participante pode achegarse á  nosa lingua dunha maneira creativa. 

Estes talleres botaron a andar en xaneiro e contan con alumnos e alumnas de varios niveis da ESO e Bacharelato. 

As Curuxas (nome que recibe o grupiño) xúntanse nos leceres na Biblioteca, acompañados do profesorado voluntario que axuda a dar forma ós pensamentos, emocións e ideas a través de diferentes exercicios literarios.

Como non hai a presión propia dunha aula, o alumnado marca os seus propios tempos e deixa voar a súa imaxinación de xeito único, dando lugar a creacións persoais e sen limitacións.  Estes traballos serán incluídos na revista escolar A Rebola e tamén presentados a concursos (por exemplo, o concurso de microrrelatos da RAG, ou o concurso do instagram #namórate). 

Nestes obradoiros aproveitamos para idear pezas relacionadas con días conmemorativos, como o Día da Paz, Día de Rosalía, Día da Muller...), que ademais son expostas en diversos puntos do centro. Ditos obradoiros son variados, dende a escrita propiamente dita, como a práctica do lettering, ata o uso da IA para realizar cancións e o deseño de marcapáxinas ou carteis.

Pero non só iso! Tamén son parte activa do equipo de alumnado do EDL, que vela porque as diferentes actividades se desenvolvan de xeito axeitado: gravan os vídeos, edítanos, montan os decorados, os puntos de lectura...

A Escola de Prensa, pola súa parte, encárgase de compilar información para redactar a revista (escriben artigos, compoñen críticas de obras lidas, realizan entrevistas a diferentes membros da comunidade educativa...) e tamén axudan a maquetala.

Todas estas tarefas, ademais, axudan a desenvolver o seu sentido crítico e autonomía. Feitos que, sen dúbida, lles serán de proveito para o futuro!

As Curuxas da Rebola (4º da ESO)

A CANDELORIA 2025 IES DE BECERREÁ

 O IES de Becerreá conmemora este día con unha exposición fotográfica e do refraneiro popular sobre as Candelas

O 2 de febreiro celébrase o día das Candelas, unha festa que é de gran importancia na vila, posto que a virxe que leva ese nome é a patroa do lugar. Adoita celebrarse unha misa cunha procesión na que os fregueses portan candeas acesas.

Máis alá do significado relixioso, no noso centro quixemos dar visibilidade a esta festa que tamén ten un significado simbólico: a tradición di que é o momento no que se comeza a deixar atrás o duro inverno e comeza a achegarse a primavera, e con ela, o bo tempo. 

A primavera trae luz e cor, e é cando casan os paxariños. Existe unha gran cantidade de refráns a propósito deste suceso, que nos gustou recoller nunha exposición para que todo o alumnado puidese lelos e lembralos. 

Na exposición tamén se apuntou á orixe romana da festividade, xa que ó comezo foi unha festa pagá da fertilidade onde a luz e o lume tamén tiñan unha gran relevancia.

Ademais, como adoita suceder en moitas ocasións, esta data tamén se conmemora noutros lugares do mundo, así que o alumnado do centro, procedente doutros lugares (como Colombia ou Perú) tamén se viu representado nesta mostra con imaxes da Candeloria neses países, e outros. 

Finalmente, o alumnado do equipo do EDL é o protagonista dun vídeo sobre unha enquisa realizada ás familias acerca de como viven nas súas casas esta festividade. As conclusións resultan moi interesantes, non volas perdades! Para velas, premede no vídeo:

ACTIVIDADES DO DÍA DA PAZ 2025 NO IES DE BECERREÁ

O alumnado de Becerreá conmemorou este día recitando unhas cantigas en galego

No vestíbulo do IES de Becerreá presentouse o 30 de xaneiro unha exposición para conmemorar o Día da Paz e a non violencia. A temática versaba sobre as cantigas de amigo, e a decoración (coa colaboración co Departamento de Debuxo) estaba baseada na recreación dun pergamiño e unha serie de miniaturas. 

A este respecto, podemos destacar a Martín Codax, ó que tomamos como referencia, que é especialmente coñecido polas súas Cantigas de amigo, que se conservan no Pergamiño Vindel, un dos máis importantes manuscritos medievais galegos. Este pergamiño, datado no século XIII, contén sete cantigas de Codax e é unha das poucas fontes que preservan a súa obra. O Pergamiño Vindel é un tesouro literario e musical, pois ademais de recoller as letras das cantigas, tamén inclúe notación musical, o que permite reconstruír a melodía das pezas. As Cantigas de amigo de Codax son especialmente destacadas pola súa expresividade e pola súa capacidade de transmitir os sentimentos de amor e tristeza da protagonista feminina, á que se presenta como unha figura apaixonada e profundamente emotiva. A súa obra, transmitida grazas a este pergamiño, representa un fito na poesía medieval galega e na música da época.
O alumnado de 3º da ESO, guiados polo profesorado de Lingua Galega, elaborou as súas propias cantigas e recitounas diante de todo o centro!

Alumnado do IES de Becerreá no tempo do lecer, acudindo ás actividades do Día da Paz 

Á parte disto, o alumnado de Latín e Grego de 2º de BAC preparou unha serie de lecturas que teñen como temática principal, entre outras, a paz. Por unha parte, Lisístrata, que expón a particular solución grega para paz dunha serie de mulleres atenienses e espartanas para rematar coa guerra entre ambos bandos. Por outra, a Eneida e en especial a figura do heroe troiano Eneas, que encarna os valores do respecto entre pobos, a boa convivencia e a solidariedade. Tras reflexionar sobre as lecturas, redactaron unhas conclusións e expuxéronas a todo o centro no Día da Paz.
Por último, tamén se leron en voz alta unha serie de propósitos para a paz que todo o alumnado foi depositando ó longo da semana na Biblioteca, e rematamos escoitando a canción "Lisístrata", do grupo galego Fillas da Casandra. 

Para ver o desenvolvemento das actividades, preme no vídeo!

MAGOSTO EN COMPAÑÍA DE ALUMNADO DO CEIP SAN XOÁN

MAGOSTO 2024 NO IES DE BECERREÁ

Como non podía ser doutro xeito, nunha xornada de outono celebrouse no IES de Becerreá o Magosto, unha das festividades máis esperadas do alumnado pola diversión que a caracteriza. Os alumnos e alumnas de 4º da ESO organizaron un concurso baseado en xogos tradicionais galegos que remataba cunha tómbola na que cambiar os puntos acadados por premios. Entre estes pasatempos típicos podemos mencionar, entre outros, o xogo das cadeiras, a rá, a pesca con anzó, a mariola... No vídeo que presentamos aquí podédelos ver máis detalladamente. 

Pero isto non é todo! Este ano, ademais, contamos coa presenza dos nenos e nenas de 5º e 6º de primaria, que nos acompañaron e o pasaron xenial. A finalidade desta actividade, promovida polo ENDL, coa colaboración dos diversos departamentos e a implicación do alumnado organizador, non é outra que gozar dunha xornada lúdica e á vez fomentar elementos típicos da cultura galega como os xogos tradicionais. Xogos que, sen dúbida, a maioría coñece pero certo alumnado estranxeiro nunca tivera contacto con eles. 

Finalmente, os momentos de diversión remataron coa degustación de doces. Certamente, para repetir!

Preme para ver o vídeo e as fotos da actividade.

Programa Ponte da USC

Como era o mapa de Galicia hai 100 anos, charla da man de Rubén Castro Redondo

Dentro do programa “A Ponte” da USC, Rubén Castro Redondo, profesor de Historia Moderna da facultade de Humanidades de Lugo, estivo falando no IES Becerreá co alumnado de 2º de BAC de “como era o mapa de Galicia hai 100 anos”.

Comentou  que a organización territorial de Galicia está baseada nas parroquias ou freguesías dende hai séculos: no catastro de Ensenada de 1750 xa se recollían 3.700 parroquias, as mesmas ca hoxe; porén mudaron as provincias, de sete a catro,  e os concellos, de 660 a 313.

O alumnado procurou na rede documentos do mencionado catrastro de Ensenada no que aparecían cuestións curiosas como que as xurisdicións das parroquias non lle corrrepondía ao rei, como acontecía noutros territorios, por exemplo, Castela, senón a nobres, mosteiros, señores… Así mesmo outras relativas a “quen mandaba”, número de veciños, profesións, cultivos, etc.

Festexos de Nadal no IES de Becerreá

Nadal 2024 no IES de Becerreá

O pasado 20 de decembro celebráronse unha serie de actividades no centro para festexar a chegada do Nadal e dar comezo a un breve periodo de descanso despois de tanto esforzo nos primeiros meses deste curso. E que mellor maneira de festexar estas datas que compartindo momentos xuntos! 

 

Así pois, a xornada deu comezo coa representación da obra teatral titulada 'Atraco no banco', na que o alumnado de 2º da ESO se metía no papel duns atracadores para dar vida a unha divertida comedia dirixida e adaptada polo profesorado do Departamento de Lingua Galega. Foi posta en escena no salón de actos do centro, onde os alumnos e alumnas da ESO, o profesorado e o persoal de administración e servizos que así o desexaran acudiron a vela. 

Tras a obra, tanto os estudantes da ESO como de BAC reuníronse no hall do edificio acompañados de antigos alumnos, profesorado e outros membros da comunidade educativa. Neste espazo compartiron amenos momentos, como comer os doce lacasitos (en lugar das tradicionais 12 uvas) e os roscóns de Reis acompañados de chocolate quente. Foi un momento ideal no que o grupo de pandereteiras amenizou a festa tocando algunha peza. Tamén se fixo un bingo con agasallos para os gañadores.

PREME PARA VER O VÍDEO DOS ACTOS 

E AQUÍ A POSTAL DE NADAL 2024 

Charla sobre diversidade Lingüística no marco da Ponte da USC

Dentro do programa A Ponte da USC, visitounos Miguel González Pereira, profesor contratado doutor na Universidade de Santiago de Compostela (USC), adscrito ao Departamento de Lingua e Literatura Españolas, Teoría da Literatura e Lingüística Xeral.

Para o alumnado de 1º e 2º de BAC falou da diversidade lingüística e comunicación intercultural, González Pereira destacou a importancia de recoñecer a variedade de linguas no mundo, tanto orais como de signos, e comprender como o entorno cultural inflúe na configuración das linguas. Falounos de variedades lingüísticas dentro das comunidades humanas e non de linguas entendidas ao xeito tradicional. No caso do Estado Español, a diversidade lingüística reflicte non só a coexistencia de varias linguas oficiais (galego, catalán, eúscaro, aranés e castelán), senón tamén dunha rica variedade de dialectos e sociolectos dentro de cada unha delas.

Este enfoque busca promover a comprensión mutua e o respecto entre culturas, esencial nun mundo globalizado. A preservación das linguas minoritarias e a educación plurilingüe son aspectos clave nas súas reflexións, co obxectivo de fomentar a interculturalidade e evitar a homoxeneización cultural.

Charla da man de Carlos Calhón

Carlos Callón (Ribeira, 1978. Profesor no instituto San Clemente de Santiago de San Clemente de Compostela, doutor en Estudos Lingüísticos e Literarios do Galego e do Portugués e presidente de honra da Mesa pola Normalización Lingüística) veu presentar O libro negro da lingua galega que documenta cinco séculos de represión e silenciamento do galego, desde 1480 ata 1986. A través de máis de 700 páxinas, o autor recompila testemuños e documentos, moitos deles descoñecidos ata agora, que evidencian as diversas formas de persecución sufridas pola lingua galega. Callón destaca a sorprendente resistencia do galego a pesar destes ataques, subliñando a importancia de coñecer o pasado para comprender o presente e traballar na súa recuperación.          

O acto durou aproximadamente hora e media e espertou o interese e curiosidade do alumado    asistente de 4º da ESO e 1º e 2º de BAC tanto polo extenso labor de documentación que require a obra como por algúns feitos que se relatan: castigos escolares, multas polo uso do galego en público ou queimas de libros.