BLOG DO Equipo de Dinamización Lingüística do
IES DE BECERREÁ
"A REBOLA"
sábado, 26 de maio de 2018
NOVO ENCONTRO COMARCAL DE PING- PONG NO IES DE BECERREÁ
XORNADA DE CONVIVENCIA NA COMARCA DOS ANCARES EN ESTADO PURO ORGANIZADA NO IES DE BECERREÁ
Outra edición máis deste encontro,
no que participou alumnado da ESO dos CPI de Navia, Cervantes, Caurel e
Pedrafita, así como o alumnado de 3º da ESO do noso centro, encargado da
organización e coordinación do torneo.
Co obxectivo de presentar a este
alumnado unha experiencia de convivencia a través do tenis de mesa, un ano
máis este alumnos e alumnas déronnos un exemplo de respecto mutuo e
colaboración durante toda a xornada. Esta comezou co torneo individual, co
alumnado repartido segundo tres niveis de xogo, establecéndose un vencedor por
cada mesa (oito en total, nas que participaban oito ou dez xogadores e
xagadoras). A continuación, desenvolveuse o torneo de dobres, para o que se
establecen parellas que se forman nese momento, baixo a premisa de que deben
estar compostas por alumnado de distintos centros. E como sempre, cando chega o
remate da xornada queda esa sensación de que o tempo pasa demasiado rápido
nalgunhas ocasións, e que esperar un ano para repetir este encontro parece
demasiado longo. Grazas a tod@s e ata a próxima edición.
"A lingua non para" foi o lema desta XVIII na que o centro participou ca súa pancarta.
O mércores día nove na Praza de Santa María de Lugo reuníronse
estudantes de Primaria, Secundaria e Bachelerato para reivindicar un
ano máis a importancia do galego. O alumnado de 4º da ESO do IES de
Becerreá sumouse a esta iniciativa pola lingua, que se organiza en toda Galicia
dende hai xa 18 anos. Acudiron á Festa
Final uns 3.000 rapaces de 56 centros educativos de toda a provincia,
que participaron nos actos da nova
de edición Correlingua 2018.
O coordinador Manuel Muñiz destacou que a escola adoita
ser en moitos casos a "única relación" dos estudantes coa
súa lingua materna. O resto de autoridades apuntaron na mesma
dirección e insistiron na importancia de eventos en prol da lingua. O Correlingua será igual en todos os puntos da
xeografía galega. En Lugo os rapaces participaron nunha carreira pola
muralla e leuse o manifesto “Rapea que a lingua non para”,
escrito polos alumnos do IES Antón Fraguas de Santiago de Compostela. O grupo melidense Cuarta Xusta ofreceu
un concerto para clausurar o acto. Ademais entregáronse os premios e agasallos
a todos os participantes, incluidos o noso centro.
sábado, 5 de maio de 2018
CELEBRACIÓN DOS MAIOS
O día 2 de maio no IES de Becerreá celebramos coa á colaboración da Asociación Cultural Abrente das Nogais a festividade dos Maios
Nunha tarde moi festiva todo alumnado do centro sumouse a esta actividade organizada polo EDL do IES de Becerreá, e na que tivemos a sorte de contar coa colaboración da Asociación cultural Abrente de As Nogais, á que lle estamos profundamente agradecidos.
O alumnado de 3ª da ESO foi o encargado da Exposición no vestíbulo do instituto, na que se recolle información sobre a orixe e celebración desta festividade en toda Galicia. Pola tarde do alumnado de 1ª da ESO realizouse unha actuación na que se expoñía este mesmo tema, dando a coñecer a tipoloxía de celebración nas diferentes zonas de Galicia. Para completar este traballo a Asociación Cultural Abrente amosounos como se conmemora o ciclo de maio nas Nogais en representación da celebración dos maios na Comarca dos Ancares. Tamén puidemos disfrutar dun concurso de puchos de flores, que resultou moi divertido, premiouse a orixinalidade e a gracia no posado.
Para rematar todo o alumnado e o profesorado de centro representaron cantando e bailando un "MAIO MOZO" típico de Viveiro, para esta actividade compuxéronse letras adaptadas aos nomes das rúas da Vila de Becerreá. A idea era dar a coñecer esta tradición perdida en moitos lugares de Galicia, e recuperar esta festa na Comarca dos Ancares.
Video da celebración
domingo, 11 de marzo de 2018
IES de Becerreá a prol da IGUALDADE
"Se as mulleres paramos para o mundo" foi o lema que seguimos dende o EDL do centro para reivindicar a igualdade
Os actos conmemorativos comenzaron o pasado xoves día 8 de marzo cando profesoras e alumnas secundaron o paro convocado para o día 8 de marzo, concentráronse á entrada do centro por unha causa común .
Exposición alumnado Lingua Galega e Biblioteca
O Dertamento de Lingua Galega, o EDL do IES do centro, o Equipo da Biblioteca e o Departamento de música, traballaron coordinados para o acto de celebración do Día da Muller, o venres 9, no que se expuxeron as actividades realizadas para fomentar a igualdade entre xéneros.
As alumnas de Afondameto de Lingua Galega, Celia Pardo, Esther López e Paula Álvarez, de 1º de BAC, presentaron o acto, e realizaron un traballo de análise de cancións de marcada mensaxe feminista que elas mesmas traduciron ao galego, e que resultou moi interesante. Dende o Equipo da Biblioteca traballouse co alumnado de 1º da ESO que aportou imaxes daquelas mulleres (anónimas) ás que máis admiran (xustificando a súa elección nun breve texto que leron máis tarde). O Departamento de Música clausurou o acto ca interpretación musical de todas as alumnas, persoal non docente e profesoras, que fixeron valer a súa voz para expresar e reivindicar a igualdade. Foi un acto emotivo no que todas; alumnas e profesoras participamos, e do que toda a comunidade educativa quixo formar parte, para sumarse a esta causa. Aquí podes ver as fotos e debaixo, o vídeo.
VIDEO DO ACTO
martes, 27 de febreiro de 2018
ROSALÍA VIVE EN NÓS
"Rosalía vive en nós" foi o acto organizado polo alumnado de Afondamento en Lingua Galega de 1º de BAC para lembrar a Rosalía un ano máis.
Esther, Miguel, Celia, Xoel, Paula, Marcos e Nico leron o manifesto de María Reimóndez, ademais realizaron un video titulado "Rosalía vine en Nós", dirixiron a poxa literaria que resultou moi animada, cunha gran participacipación de alumn@s e profesor@s. Como novidade Bilal Khoursa recitou en árabe o poema de Rosalía "Airiños, airiños aires", que el mesmo traduciu.
Nun mundo de fiestras pechadas, buscamos o refacho de vento que
as abra de vez. Nun mundo que busca facer as comunidades e as persoas máis
pequenas, os cartos e a cobiza máis grandes, precisamos forza e profundidade,
emoción e pensamento. Ante as fiestras pechadas contra a vida, contra as voces
das mulleres, das desprazadas e das nosas outras cómprenos unha palabra firme e
abranguente que nos guíe. No bater das fiestras que cheiran a couza do pasado,
a mentiras que repetidas mil veces queren chegar a ser verdades, a fala que se
nos rouba e aire que nos falta precisamos a bravura das mareas e o salvaxe das
montañas. Precisamos todo do que falou e todo o que foi Rosalía de Castro. Ela é o refacho que busca
abrir as nosas fiestras. Un refacho que chega dende o pasado para nos falar do
futuro. Un refacho que quere abrir a fiestra para que poidamos navegar. Coa
forza das baleas, da que busca novas fillas do mar, da que se ri dos papeis de
xénero e nos anima a redefinilos como literatas. Un refacho que trae a voz de
todas as meniñas gaiteiras que están por chegar. Un refacho que canta a vida e
transforma todo dende as raíces.
Mais para que o refacho entre, precisa da
nosa vontade. Pídenos, imperiosa: Abride a fiestra!
E na nosa man está abrir a fiestra. Abrila
para vermos a muller, a escritora, a irredutible. A voz que nos une ás rebeldes
do mundo, que fascina coa súa luz por onde pasa, que nos ofrece a súa
clarividencia para tecermos novas alianzas, a que sempre está do lado da
xustiza, do noso lado, a que sempre está aínda por descubrir. Porque en todos
os recunchos do mundo, mais sobre todo aquí, en Galicia, hai rosalías que
cantan e que falan, alancando con brillantes e destemidas botas azuis entre a
lama.
Rosalías que abrimos a fiestra saíndo á rúa
contra o espolio da terra que ela cantou, ecolóxica antes de que existise nin o
termo. Cada vez que nos negamos a seguir converténdonos en plantación de
eucaliptos, minas, xeriátrico e mercadoría, reivindicando a paisaxe que ela
utilizou politicamente coma ninguén. Cada vez que pulamos polo público, a
sanidade, o transporte, as axudas a quen está na marxe e ela puxo sempre, dende
o afecto e a transgresión, no centro. Cada vez que desfacemos o discurso que
sustenta a violencia de tantos Pedros mediante a escrita e a acción feminista,
contra todos eses que seguen ladrando mentres nosoutras camiñamos.
Abride a
fiestra para as viaxes interiores, para a coraxe dos afectos, para sermos das
que non temos medo de pensar e de sentir simultaneamente, de recoñecernos
mulleres con palabra e voz propia, herdeiras e compañeiras daquela que en cada
dedicatoria se recoñecía nas súas iguais.
Abride a
fiestra á afouteza e ao abraio, á redefinición do que a historia dos homes fixo
de mulleres irreverentes coma ela.
Abride a
fiestra porque Rosalia de Castro é o mundo que está por facer. Un mundo que se
abre se o abrimos.
María
Reimóndez
domingo, 18 de febreiro de 2018
ENTROIDO 2018 IES DE BECERREÁ
Como cada ano o IES de Becerreá celebra o Entroido dunha maneira especial, a decoración para esta ocasión consistiu na realización de máscaras de Peliqueiro, na que cada alumno de 4º da ESO reflictiu a súa personalidade elixindo un animal co que se sentían identificados. Ademais o alumnado de 4º organizou os actos de celebración do Entroido (concurso de disfraces, quiema do espantallo e concurso de doces), nos que participamos tod@s de moi de moi boa gana.
Este ano o alumnado escolleuse como espantallo aos membros de "La manada" , espantallo que eles mesmos elaboraron.
Aquí deixamos o vídeo para que vexades como foi todo, e quixeramos salientar, polo seu significado especial, a parte na que Fran (4º da ESO) fai referencia ao espantallo deste ano e ao significado especial da súa queima nesta ocasión.
Por primeira vez celebramos no IES de Becerreá a festividade das Candelas.
Os alumnos de 1º da ESO do centro fixeron un excelente traballo para amosarnos a orixe e tradición desta festividade da vila de Becerreá.
A festa das Candela celébrase en Becerreá o 2 de febreiro, unha festa que se está a perder, e que queremos recuperar. Por iso o traballo dos nosos alumnos de 1º da ESO lévanos a reflexionar sobre a súa orixe e a celebración, que marca a metade do inverno, e a chegada dos días claros da primavera.
