SEMANA DA PRENSA 2026

 SEMANA DA PRENSA, EN GALEGO.

    Do 9 ao 13 de marzo levouse a cabo a semana da prensa no noso centro. Durante toda a semana os alumnos e alumnas podían acudir á Biblioteca, acompañados de profesores e profesoras das materias, ou no lecer para ler a prensa, tanto galega como nacional e internacional. 

    Fixéronse distintas actividades cos xornais, de xeito que os estudantes puxeran en práctica o pensamento crítico e a creatividade e á vez estiveran ao tanto do que sucede no mundo: analizaron datos, buscaron etimoloxías de palabras, comentaron textos, reflexionaron sobre as novas...

Velaquí un traballo realizado polo alumnado de Grego de 2º de BAC. Empregando os xornais, investigaron sobre a etimoloxía de palabras en galego, anotando, en grego, a súa orixe.

DÍA DA POESÍA NO IES DE BECERREÁ

 CALIGRAMAS POLO DÍA DA POESÍA 

    O 20 de marzo celebrouse o Día da Poesía no IES de Becerreá, que se reflectiu na exposoción do “Tendal da poesía” no que se colgaron, como se se tratara de prendas, uns caligramas que realizou o alumnado na biblioteca a partir de poemas de autores galegos ou en lingua galega. 

    O caligrama é unha forma creativa de poesía na que as palabras forman debuxos relacionados co seu contido. A actividade permite xogar coa linguaxe combinando arte e escrita, ademais, é unha forma de achegar a literatura galega ao alumnado.

DÍA DA MULLER NO IES DE BECERREÁ

 POR UNHA IGUALDADE REAL E EFECTIVA ENTRE HOMES E MULLERES

O IES de Becerreá é un centro comprometido coa igualdade entre homes e mulleres. Desde o Equipo de Dinamización Lingüística promovemos a reflexión sobre os dereitos das mulleres e a igualdade de oportunidades. Para iso, desde distintas materias, o alumnado realizou actividades que ensalzan os valores do respecto mutuo, a xustiza e a inclusión, e logo fíxose unha exposición co resultado na entrada do centro, como cada ano. Por exemplo, na materia de Música traballáronse as figuras femininas da historia, case sempre infravaloradas e silenciadas; e na materia de Latín, a partir dun texto contemporáneo, o alumnado fixo unha revisión do mito clásico desde unha perspectiva feminista. Ademais, este curso completouse dita exposición con mensaxes positivas cara a mulleres por parte do alumnado de 1º da ESO.

Neste enlace de Calameo está o traballo realizado polas alumnas de 1º de BAC de Latín I, e tamén se poden ver as restantes publicacións do 8M, entre elas a táboa das científicas realizada no pasado curso. 

DÍA DA MULLER E A NENA NA CIENCIA EN BIOLOXÍA

 SCAPE ROOM CIENTÍFICO 

O 11 de febreiro celebrouse o Día da Muller a Nena na Ciencia. Na materia de Bioloxía de 4º da ESO e tamén en FP Básica quixeron conmemorar ese día cunha divertida actividade. Tratábase de averiguar catro códigos relacionados con investigacións feitas polas catro das grandes científicas: Rosalind Franklin, Jane Goodall, Marie Curie e Margarita Salas. 

Sen dúbida, unha magnífica maneira de aprender máis sobre estas grandes figuras!

Velaquí unhas imaxes das gañadoras e do desenvolvemento da Scape room:

DÍA DE ROSALÍA 2026

 AIRIÑOS, AIRIÑOS, AIRES
EN VARIAS LINGUAS

Na xornada do 27 de febreiro, despois dunha semana dedicada a traballar co famoso poema de Rosalía de Castro, Airiños airiños aires, contido en Cantares Gallegos, reunímonos todos na entrada principal do edificio para homenaxeala. Primeiro, tivo lugar a lectura dun manifesto no que homenaxeamos á autora, e a continuación varios alumnos e alumnas recitaron o poema en diferentes linguas, que eles mesmos traduciron coa axuda do profesorado. Os traballos expuxéronse durante toda a semana, e recolleranse a final de curso na revista A Rebola. 

Aquí o vídeo da actividade